الرئيسية » منوعات » 14- Serial doctors دكتور قاتل !

14- Serial doctors دكتور قاتل !

Serial doctors

هذه المقالة محاولة لتجميع قصة بالعامّية نشرها الدكتور ناصر أمجيد بعنوان Serial doctors حين كان طبيبا خارجيا، في صفحة تحمل نقس العنوان على الفايسبوك. رابط الصفحة الذي لم يعد يعمل https://www.facebook.com/pages/Serial-Doctors

Serial Doctors

الحلقة 14 :

كاع هادشي كان موجدو لراسو…و كنت كانعرفو فالعام الثاني ديالو، و تشوفو كاع ماتقول راه كايفكر يصيفط راسو…صدق داكشي مكتاب لبنادم آخر للي يستاهل.

الغبرة للي غبر هاد المرة أطول من للي قبل منها….ماتخلعتش عليه بقدر ما توحشتو. ماكانش خاصني نجبد معاه داك الموضوع. خصوصا الواليدة ديالو.

عاود ليا عليها بزاف فالعامين اللولة ديالو، مكانتش أفضل أم فالدنيا كيما كايقول كلشي على الأم ديالو…و لكن كانت هي نقطة الضعف عندو….وقتما تخيلها كاعية ولا كاتبكي كاينوض فحالو.

داز شهر بالتمام و الكمال، مراكش بدا كايزيان فيها الجو، و الكليان كايكترو….و لكن الكليان للي بغيتو يجي غابر.

وصل السبت و هو يدخل بحال التران…دفع الباب، و مشا لبلاصتو ديريكت ما هضر مع تاواحد. الله يسمعنا خبار الخير.

جبت ليه الخمسة…مع حطيتهم مع قاليا نزيد جوج اخرين. موالف كايشرب دقة دقة، و لكن اليوم من الدخلة ديالو تا حاجة ماعادية.

جلست حداه لقيتو كما الكارو اللول بالزربة…بقيت غير كانشوف فيه، حتا عياه السكات و هو يهضر :

– مافهمتش علاش وراتها ليا…..و علاش صيفطاتو؟؟…مايمكنش، فأي لحظة تقدر تصيفطني حتى أنا.

– شكون هادي أ دكتور؟؟ مالك؟

– سالينا داك السربيس سيمانة هادي… و بدينا سربيس جديد فيه تاني ليكارد. النهار اللخر فالسربيس جات عندي. سميتها أميمة، بنت مراكش، معانا فالكروب و لكن ماكاتحسش بيها كاينة حيت ديما ساكتة، داخلة سوق راسها و داياها فقرايتها.

جات عندي و مدات يديها….ماموالفاش كاتسلم مع الدراري…كيطرا وجرا؟

حطات ليا شيحاجة فيدي و قالت ليا :

– هاك جمع هادي راه كانت حداه….و فيها الخط ديالك.

حطات فيديا ورقة مكمشة….شفتها و هو يكرم ليا الما فالركابي.صدقت حمار و أكبر حمار.

الورقة للي كنت حطيت فيها الفانيد لداك خينا، قطعتها من دفتاري…و بالفعل فيها لخط ديالي.

عاقت بيا…و لكن علاش مافرشاتنيش؟ علاش عاطياني الورقة للي كانت تصيفطني؟ و علاش تسنات هاد المدة كاملها عاد عطاتها ليا؟ واش باغية تلعب معايا للعب الخايب؟

أميمة بنت الناس و ضريفة و ماعمرني شفت منها العيب….و لكن مايمكنش نتشد….مايمكنش نخوي السبيطار….ماكاينش للي غايدير خدمتي فبلاصتي.

سمحي ليا أ أميمة…لوكان خليتي الورقة عندك او فرشتيني كاع، كنتي غاتدوزي…و لكن ملي حكيتي عليا، خاصني نقطع ليك. و فلاكارد ديالك الجاية

عن La Perle Rose

شاهد أيضاً

Serial doctors

34- Serial doctors دكتور قاتل !

Serial doctors هذه المقالة محاولة لتجميع قصة بالعامّية نشرها الدكتور ناصر أمجيد بعنوان Serial doctors حين كان طبيبا ...