19- Serial doctors دكتور قاتل !

– علاش صيفطي دوك الثلاثة نتا بعدا؟

بقيت كانعاود ليها كيما عاودت ليك أ إسماعيل، غير هو تقطعت…. ماقديتش نكمي حداها، من الناس لقلال من بعد الوالد و خويا للي ماقدرتش نجبد كارو حداهم… وصلات الثلاثة د الصباح، عاودت ليها على هند و المراة للي كاتبيع ولادها و القصة د الحباس…. كلشي.

– نتا كتسناهم حتى يديروها فين يغرق الجمل باش تقطع ليهم كيما كاتقول… و لكن ديك الساعة راه فات الفوت…. راه هند تغتصبات، و ولد المراة كان مبيوع، و البنت راه حملات و تخلا دار بوها و طيحات الولد و غاتعيش حياتها كاملة معقدة.

علاش نتسناو حتى يوقع للي بغا يوقع ؟ للي غايدير شيحاجة راه باينة فعينيه… بحال با، سكايري و الفلوس د الطاكسي كايصرفهم شراب، راه باينة مرتو و بنتو واكلين الدق.

– ماغانحكموش على الغيب أ اميمة…. إلى مادارش، مايستاهلش.

– إلى داز من عندي و ماماتش غايديرها و يجي عندك…. النتيجة هي هي، هو غايموت، غير فاش وصلك نتا راه شحال من واحد آخر تضرر.

فواحد اللحظة نسيت أنني كانهضر مع أميمة الدريويشة، بنت دارهم للي ماكاتدويش إلى ماسولتيها…. هاد البنت لي قدامي قوية، عنيفة فتفكيرها، و أنا إلى كنت كاندير خدمة عطاها ليا لله…. هي هكا راه بغات تلعب الدور ديالو.

هاد المرة حليت فمي فالدكتور … غير كايدكر سميتها كايتبسم بلا مايحس…. و ماساطش فالقراعي الأخيرين كيما موالف… طاح الدكتور، وطيحتو غير الله يحضر فيها السلامة.

ناض فحالو، البار قرب يسد، السرباية لخرين بداو كايجمعو الكراسة.. أنا فاش كايدخل الدكتور كاننسا واش أنا خدام هنا… كانعطيها للتعاويد و للي بغا يخدم يخدم.

خلصني… و خرج كيفرنس من الودن حتال لودن.