La Perle Rose اللؤلؤة الوردية Nous partageons le bonheur ! معا ننشر السعادة
Serial doctors
هذه المقالة محاولة لتجميع قصة بالعامّية نشرها الدكتور ناصر أمجيد بعنوان Serial doctors حين كان طبيبا خارجيا، في صفحة تحمل نقس العنوان على الفايسبوك. رابط الصفحة الذي لم يعد يعمل https://www.facebook.com/pages/Serial-Doctors
Serial Doctors
الحلقة 27 :
———————————–
عندي 20 دقيقة ولا أقل باش يبدا لعصير يدير خدمتو، قلت ليها غانهبط نكمي، و أنا نضربها بجرية للمستعجلات…. رجليا بداو كايخويو بيا، ذاتي كلها كاترخا شوية بشوية….. الوحيدة للي فضلتها على راسي…. بغات تقطع ليا.
بغيت نهز الموطور نمشي للدار، و لكن يديا بداو كايترخاو و غانصدق غير داير شي موصيبة. شوية تفكرت داك البيت فاش كاينعسو صحاب الاستقبال و الصندوق.
مشيت بالجرا، أو بداكشي للي بقا عندي ديال الجهد ل لاكيس، الدري للي كاين ديك لليلة سميتو رشيد… دكالي حقيقي و رجل تعول عليه، طلبت ليه الساروت د لبيت … جاتو عجب حيت ماموالفش كاننعس، و لكن شكون خلاك تبقا فايق.
عطاها ليا، سولتو واش عندها شي ضوبل، قاليا كاينة غير وحدة كايشدها للي فلاكيس فالليل حيت حاطين فالبيت واحد الثلاجة صغيورة و فرفارة مابغاوهومش يتشفرو.
مشيت كانتلاوح، دخلت، قفلت الباب، خليت فيه الساروت و بلوكيتو بواحد الكرسي كان تما…. طحت بحال الميت فوق داك السرير…. ما فيقني غير الغوات فالمستعجلات فالصباح.
واخا داك الدوا كايطيحك دقة وحدة، و لكن فاش فقت حسيت بحال الى دماغي ماحبسش الليل كامل، الليل كامل و هو كايحاول يفهم، كايحاول يلقا ليها مبرر، كايحاول …. و كلمة وحدة بقات خدامة فيه: علاش ؟
علاش أنا للي بغيتها، أنا للي كنت غانخالف أي حاجة كانآمن بيها باش نرضيها، أنا للي عميت عينيا و بصيرتي على أي حاجة دارتها.
خرجت من البيت، رديت الساروت لرشيد، شكرتو و بقا شاد فيا، حيت فاللول فاش ماكنتش كاننعس قاليا راه غير الجهد د اللول هاداك…. ما عارفش ان للي نعسني هاد الليلة هي البنت للي شفت راسي معاها هازين ولادنا بجوج واحد النهار..
