الرئيسية » منوعات » 31- Serial doctors دكتور قاتل !

31- Serial doctors دكتور قاتل !

Serial doctors

هذه المقالة محاولة لتجميع قصة بالعامّية نشرها الدكتور ناصر أمجيد بعنوان Serial doctors حين كان طبيبا خارجيا، في صفحة تحمل نقس العنوان على الفايسبوك. رابط الصفحة الذي لم يعد يعمل https://www.facebook.com/pages/Serial-Doctors

Serial Doctors

الحلقة 31 :

———————————————————
” (..) حليت الابرة، حطيتها فايديها حتى هي حتى لصقو صباعها عليها مزيان، من بعد عمرتها على حدها.

أميمة كاتخدم باليسرية، يعني خاصني ندك الابرة فاليمين ديالها…. حطيت الابرة لعامرة فيدها ليسرية، دخلتها فيدها الأخرى، حطيت صبعها على لفوق د الابرة…. بقا خاصني غير نضغط…. ماقدرتش…. ساعة و نص دازت، بغيت نشوف فعينيها لآخر مرة، و لكن موحال تفيق ليا…. بقيت شاد الابرة وسط يديها، حركتها بشوية، زعزعتها، كانعيط ليها بشوية حدا ودنيها…. تحركات شوية…. بقيت شاد الابرة لا تهرس ولا تخرج…. حلات عينيها شوييية و شافت فيا…. حلات فمها، كاتقطر الهضرة :

– عرفتيني علاش….. كنت …. ناوية و …. درتيها بيا.

حسيت بشيحاجة وحلات فحلقي…. بغيت نبكي، بغيت نحيد الابرة و نطلبها ننساو كلشي…. مابغيتهاش تمشي…. و لكن بغيت نعرف.

– سؤال واحد أ اميمة…. علاش؟ علاش ونتي عارفة آش كنتي كاتعني ليا…. عارفاني كنت مستاعد ندير كلشي على قبلك…. علاش و انا للي عمرني ما فكرت نخسر ليك لخاطر فما بالك نآذيك.

تبسمات، واخا ابتسامة ثقييييلة.

ابتسامتها خرجات من عينيا الدموع للي عمرني خرجت…. بغيت نعنقها و نسامحها، بغيت نحيد الابرة من يديها…. و لكن مازال ماجاوباتنيش.

– قولي ليا غير علاش انا ؟ أنا للي كذبت على كلشي إلا نتي… ما عمرني حسيت بالضعف حتال حداك…. خفت عليك كثر من راسي….. بغيتك أأميمة…… و باقي كانبغيك.

بحال الى كانخوي الما فالرملة … مبنجة ماقادراش تتحرك …. عينيها فعينيا، مابكاتش بحالي، شوية فمها تحرك.

– حيت ……. كلكم….. بحال……. بحال.

ماحسيتش حتى ضغطت على اصبعها و خويت الابرة كاملها فيديها…. قطعت للوحيدة للي كانت بحالي، قطعت للوحيدة للي كان ممكن تفهمني و تقبل عليا….. قطعت للوحيدة للي حبيت….. قطعت لأميمة.”

بكا و هو كايقطع ليها، و كايبكي و هو كايعاود بلا مايحس…. دموعو حرقو عينيه و حرقوني فخاطري.

كنت كانقول أنه بكثرة بنادم لمن قطع، قلبو قساح، و لكن كان باقي فيه شوية ديال الضو لداخل….. الضو للي طفاتو أميمة، مرة وحدة.
______________________________
قصة خيالية على حلقات بقلم بدر ناصر أمجيد, طبيب خارجي

عن La Perle Rose

شاهد أيضاً

Serial doctors

34- Serial doctors دكتور قاتل !

Serial doctors هذه المقالة محاولة لتجميع قصة بالعامّية نشرها الدكتور ناصر أمجيد بعنوان Serial doctors حين كان طبيبا ...