6- Serial doctors دكتور قاتل !

Serial doctors

هذه المقالة محاولة لتجميع قصة بالعامّية نشرها الدكتور ناصر أمجيد بعنوان Serial doctors حين كان طبيبا خارجيا، في صفحة تحمل نقس العنوان على الفايسبوك. رابط الصفحة الذي لم يعد يعمل https://www.facebook.com/pages/Serial-Doctors

Serial Doctors

الحلقة 6 :
———————————–
“هاد المرة امرأة, و ماشي فالمصلحة عندنا:

كنت طالع نشوف شي صحابي فالعام السادس ديالهم, كاينين فالسربيس د الولادة…مع وصلت الطبقة الثانية وقفاتني واحد المرأة جارة واحد الوليد :”عافا دكتور واحد المرأة ولدات اليوم فالصباح سميتها —– فين ناعسة ؟”

أنا براسي مامخالطش داك السربيس, و لكن البلوزة كاتحتم عليك تكون كاتعرف كلشي وسط السبيطار…ديتها معايا عند السكريتيرة نسولها, نعتات ليا فين, و وصلتها لفين ناعسة المرأة على من كاتقلب.

الدري الصغير غير دخل و هو يطلق واحد الغوتة د الفرحة : “ماما”
دارو فيه العيالات بجوج…جاتني فشكل ديك الدورة فدري صغير فرحان بمو….و بجوجات.

بقيت واقف برا البيت, كانتسنا صحابي يخرجو من السطاف د الصباح, شوية كانسمع العيالات كايهضرو بشوية :

– آش هاد المرة دري و لا درية؟
– درية….فين عمر هاد الكرش خرجات مايفرح؟
– واش درتي معانا فيها ؟
– أنا قلت ليك آش كاين داكشي باش واخدة هاداك غاتزيديني عليه, هادي راه غير الحليب, و راكي عارفة الزيادات راه برزقهم…و ما عندها فين تهرب ليك والا تعذبك.
– إمتا وكان غاتخرجي؟؟ أما راه ماحدك كاتفرخي و راسك كايقساح.
– قالوليا بعد غدا…خاصهم يديرو شي تحاليل على القلب, قاليك شي عروقة بداو كايتبوشاو.
– بسيف…الكارو مايحيد من فمك غير ونتي ناعسة. و النهار و ماطال ونتي تجغدري.
– رزق ولادي آ مليكة هاداك و من هادشي كامل ماشغلكش فهادشي غير نخرج آري فلوسي و خودي عليا الزمر.

رجليا كرمو بلاصتهم….كاتبيع و تشري فكبدتها مزال ما كملات حتى نهار فالدنيا. لا كارد الجاية (المناوبة) عندي بعد 4 أيام, و لكن اليوم خاصني نبات فالسبيطار… “