7- Serial doctors دكتور قاتل !

المشكلة أن الدري لاخر للي معاه ماكاينعسش فلاكارد…بحالي, و لكن كل مشكلة و ليها حل.

التمنية لقاتني واقف فالمستعجلات, و لكن خدمتي ماشي فيهم, خدمتي فالطبقة الثانية…. هزيت إبرة خاوية حطيتها فالجيب د البلوزة و بقيت كانتسنا فالدري لاخر يجي.

نص الليل قرب, مشيت جبدت لعشا و شي عصير جبتو معايا و قلبت على الدري للي معايا حتى لقيتو… قسمت معاه العشا و خويت ليه كاس دلعصير و خليت الباقي كيما قلت ليه باش ندوز الكارو من بعد.

كلا…. شرب….. شوية الدري بدا كايتلاوح, للي ما عمرو جاه النعاس فالسبيطار تبوق و طلبني نكوفري عليه بينما يتكا شوية…. العصير و مايدير.

ها واحد نعسناه, المشكلة الثانية أن السربيس د الولادة كاتظل فيه الحركة…. و خاصني مانبانش فيه بزاف حيت لفراملية ماكايعرفونيش و باينة فيا براني على السربيس.

وصلات الوحدة, الدري للي معايا مكوخ و شابع نعاس, طلعت لقيت الدنيا زاكية.

مشيت للبيت لقيت المرأة ناعسة و السيدة للي كانت ناعسة حداها خرجات داك النهار… سبب يا عبدي و أنا نعينك.

باقي شادين ليها العرق, وبحال هادي خسارة فيها لانسولين.

حليت الإبرة, عمرتها بالهوا و صيفطتها ليها مع العرق. بقيت واقف حداها, فيقها الحر, بغات تهضر, ماقدراتش, بقات كاتشوف فيا و عينيها بغاو يخرجو من بلاصتهم…خليتها تحقق فيا, عرفي شكون مقطع ليك.

حطيت وسادة على وجهها حيت خفت تخرج ليها شي غوتة…يديها ترخاو… السكات فالسربيس…. لحقات على بات هند.”