16- Serial doctors دكتور قاتل !

Serial doctors

هذه المقالة محاولة لتجميع قصة بالعامّية نشرها الدكتور ناصر أمجيد بعنوان Serial doctors حين كان طبيبا خارجيا، في صفحة تحمل نقس العنوان على الفايسبوك. رابط الصفحة الذي لم يعد يعمل https://www.facebook.com/pages/Serial-Doctors

Serial Doctors

الحلقة 16 :

ماجاوبتهاش، خليتها و خرجت لباب المستعجات كانكمي….دماغي ساكت، لأول مرة من مدة دماغي ماخدامش، طفا….كانشوف الدخان كايطير، و معاه حياتي، كاع داكشي للي خططت و بلانيت ليه ،الخدمة للي معول ندير…. هاد الضرافات للي طاحت عليا، هاد الشهامة ديال الأفلام للي هبطات عليا من السما…هي للي غاتسيفطني.

لا، ربي ماغاديش يخليني فهاد الوقت…مغاديش يتخلا عليا و أنا درت كاع داكشي للي بغاني ندير…..و لوكان كانت هادي هي اللخرة ليا ماكانش غايجيبني معاها فكارد وحدة.

كانحس بدماغي شعل مرة أخرى…و حاجة وحدة كادور فيه : أميمة خاصها تمشي.

دخلت للمستعجلات مابانتش ليا…سولت لفراملية تاواحد ماشافها…أواه، فين مشات هادي؟ هي سكوتية و دريويشة و لكن مرجلة، و عزيز عليها الصداع و الروينة د المستعجلات. و السربيس دابا غايكون كايصفر. زعما نعسات؟

طلعت للسربيس، لقيتو خاوي، لفراملية نعسو، الوحدة د الصباح هادي.

كايبانو ليا ليصال د المرضى طافي فيهم الضو….كنت غانعاود نهبط للمستعجلات حتى سمعت شيحاجة…بحال شي حاجة د الزاج صغيرة طاحت فالأرض.

تبعت الصوت، لاصال مناش جاي طافي فيها الضو. دفعت الباب، دخلت …. شيواحد لابس بلوزة واقف حدا المريض….غير ولفو عينيا على الظلام و أنا نتجمد بلاصتي.

أميمة هازة إبرة عامرة فيديها و كاتدكها فالتيو ديال الصيروم د المريض….شفت فالأرض و فوق السرير…..قريعات صغار كتار ….. بحال للي كاينين فالجيب ديالي.

أميمة كاتقطع ليه….بداكشي باش كنت غانقطع ليها