21- Serial doctors دكتور قاتل !

أميمة بقات ديك البنت الدريويشة السكوتية قدام بنادم، و لكن معايا كانت كاتولي أقوى بنت فالدنيا. طحت فيها اعمى، حبيت شخصيتها و قوة تفكيرها، كيفاش كاتبلاني للشهور و السنين و انا كانعيش النهار بنهارو، كيفاش كاتشد ليا الخاطر فأي رأي قلتو و من بعد كاتخليني نبدلو بلا مانحس.

فاش عاودت ليها كلشي على للي قطعت ليهم، بغات تجرب طرق جداد، خصوصا أننا دابا بجوج ماشي بوحدها… مايمكنش تحصل، مايمكنش نخليها تحصل.

كان واحد المريض عندها من الحبس حتى هو، قالت ليا متهم بجريمة ضد الأصول، غير ساقت الخبار و جات كاتجري عندي ديك العشية… الناس عندهم الكادو هو الورد و الشكلاط، و لكن هي عرفات الكادو للي تجيب ليا.

مامشيتش نتأكد أنه يستاهل يقطع، مانحتاجش، المرة اللولة للي كانحس فيها أنني مستعد نحط رجلي فجهنم، غير نكونو بجوج.

بغيت نعطيها كادو حتى أنا و خديت الوقت هاد المرة كانخمم فشي تقطيعة جديدة.

واحد صاحبتها بنت الصويرة ماكايتفرقوش إلا باش نتلاقاها انا، كانت كارية مع البنات واحد الدار، و وحدة منهم فالعام السادس كانعرفها. يدها خفيفة، كاتهز الماتيرييل من السبيطار بزاف، واخا ما عندها مادير بيه.

من زهري كانت فالسربيس ديال جراحة الوجه و التجميل. وصيت أميمة تمشي عند صاحبتها، و تهز واحد اللعبة غاتكون ديك خيتي أكيد شفراتها.

دبرنا كيفاش نتلاقاو بجوج فكارد وحدة بلا مايشك بنادم فتا حاجة….. كايلصقوها فالصدفة…. كانسميوها القوالب”